Белем бәхетле итә!

1 сентябрь рәсми рәвештә “Белем көне” дип беренче тапкыр 1984 нче елда игьлан ителә. Бу көн һәр укучы өчен зур бәйрәм. Шулай да 1 сентябрь – Белем көне генә түгел, ә туган көн дә, чөнки бу көнне яңа өметләр, яңа планнар, яңа омтылышлар туа. Бу өметләрнең аклануы, омтылышларга ия булу тик үзебездән генә тора. 

Әлеге көн студенлар хәтерендә иң якты бәйрәмнәрнең берсе булып истә калырга тиеш. Моның өчен позитив фикер йөртергә, яңалыкларга һәрвакыт ачык булырга һәм төркемдәшләр белән яхшылап танышырга кирәк булыр.
Ә КФУ хезмәткәрләре аны тагын да яктырак итү өчен зур көч куя – онытмагыз шуны! 

Габдулла Тукай исемендәге татаристика һәм тюркология югары мәктәбе һәр елны үзенә абитуриентлар кабул итә. Быел исә көндезге уку бүлегенә 120 студент кабул ителде. Алар арасында Кытай, Казахстан, Төркия, Чувашия, Башкирия, Марии Эл, Самарадан килгән студентлар да бар.

Бәйрәмне ачып җибәрү  һәм сәламләү өчен сүз – Казан федераль университетының беренче проректоры, социология фәннәре докторы, профессор Рияз Гатаулла улы Минзариповка бирелде. Ул студентларга үзенең котлауларын һәм теләкләрен җиткереп, БДИда югары балл җыйган 4 студентка институтыбызның истәлекле бүләкләрен һәм студент билетларын тапшырды. Шуннан соң тәбрикләү өчен сүз Лев Толстой исемендәге Филология һәм мәдәниятара багланышлар институты директоры, филология фәннәре докторы, профессор Рәдиф Рифкать улы Җамалетдиновка бирелде. “КФУда белем алу - авыр хезмәт, ләкин сезнең яныгызда югары квалификацияле укытучылар, фән докторлары һәм профессорлар һәрвакыт булачак. Биредә сез Россия һәм чит ил фәнни мәктәпләренең нәтиҗәләре белән таныша алачаксыз. КФУда алган белем һәм күнекмәләр киләчәктә югары сыйфатлы белгеч булырга ярдәм итәчәк, ” – диде ул. 

Чыннан да, барысы да сездән тора! Хезмәт сөючән булыгыз, күп белергә омтылыгыз, тормыш тәҗрибәсен отып калырга тырышыгыз. Онытмагыз: хезмәт сөйгән кеше генә уңышка ирешә!

Лев Толстой исемендәге филология һәм мәдәниятара багланышлар институты 3 югары мәктәпкә бүленә, һәр югары мәктәп исә үзе берничә кафедраны берләштерә. Габдулла Тукай исемендәге татаристика һәм тюркология мәктәбе директоры,  филология фәннәре докторы, профессор  Әлфия Шәүкәт кызы Юсупова югары мәктәп структурасы белән таныштырды. Уку –укыту, фән, тәрбия эшчәнлеге хакында сөйләде, студенталарны тырышып укырга , актив һәм креатив булырга чакырды. Шуннан соң кафедра мөдирләре сүз алды. Алар кафедралар турында сөйләп, 1 нче курс студентларына уңышлар, алдагы көннәрендә фәнни һәм иҗади җиңүләр яулауларын теләделәр.

Бәйрәмдә югары мәктәпнең 2 нче курс магистранты, күп кенә конкурслар җиңүчесе, университетыбызның моңлы сандугачы – Алсу Габидуллина, әле беренче курста  гына булуына карамастан, инде үзенең осталыгы белән таң калдыручы – Аминова Гөлназ, укуын гел бишлегә тәмамлап, КФУ активисты исеменә лаек булган Миннегалиева Айгөл абитуриентларга үзләренең ихлас теләкләрен җиткерде. Матур эчтәлекле әлеге чара студентларыбызның күңеленә хуш килде.

Белем көне без мизгелдә үтеп тә китте... Әлеге Белем диңгезендә кемнең ничек йөзүе күп әйбергә бәйле. Диңгез океаннарга кушылсын өчен, мәктәп, укытучылар, андагы мохит зур роль уйный. Уку йортыбызга кергән яңа буын – беренче курс студентларына “Хәерле сәгатькә! ” диясе килә.