Yübiley buqletınnan

Yübiley buqletınnan

İrnis Äxmädulla ulı Räximullin 1942 yılnıñ 3 febrälendä Qazan qalasında eşçe ğailäsendä tua. 1958-1962 yıllarda Qazan muzıka uçilişçesında, soñraq Qazan Däwlät konservatoriäsendä belem ala. 1970 yıldan alıp 1985 yılğa qädär Qazan konservatoriäseneñ xor dirijerrlığı kafedrasında uqıta, 1975 yıldan alıp bügenge köngä qädär M. Cälil is. opera häm balet teatrında xormeyster bulıp eşli. Üzeneñ belgeçlege buyınça ícat eşçänlegen unsigez yäşennän ük başlap, 1960 yılda üzeşçän xorğa citäkçelek itügä alına. 1967 yıldan alıp bügenge köngäçä Qazan Däwlät universitetında tatar Xalıq xorın citäkli. 1995 yılda Tatar Däwlät Humanitar institutında da xor oyıştırıp älegä qädär aña citäkçelek itä.

İ.Räximullin - ğömereneñ 42 yılın xor sänğätenä bağışlağan şäxes. Şul ğömer eçendä ul mäğrifätçe muzıkant bularaq tanıldı. Qazan Däwlät universitetınıñ häm Tatar Däwlät Humanitar institutınıñ yözlägän sälätle yeget-qızları İrnis Räximullin mäktäben uzdılar. Bu - xalıq cırına tirän mäxäbbät mäktäbe, tatar kompozitorlarınıñ şahäsär cırların töşenü mäktäbe, studentlarnıñ muzıkal' tabiğäten açıp alarğa qanat quyu mäktäbe. İrnis Räximullin xorında cırlağan keşelär student yılların iñ yaqtı, iñ küñelle säxifä bularaq iskä alalar. Ul yıllar alarğa yäşlek kebek ük ğäziz häm qäderle!
Rusiäneñ häm Tatarstan Respublikasınıñ atqazanğan sänğät eşleklese, professor Levanov V.P.

Berniçä distä tatarnı bergä bastırıp, alarnı xor belän cırlatu dönyadağı iñ awır eşlärneñ berseder ul. Ni öçen disäñ, härber tatarnıñ başqalardan ayırılıp torası, yalğız cırlıysı, solist bulası kilä. Annarı xor belän cırlawnıñ, xor sänğäteneñ bezdä tradisialäre dä bulmağan.

Ämenä 1967 ylda Qazan däwlät konservatoriäse studentı İrnis Räximullin Qazan universitetına kilep, bezneñ kebek awıl balaların bergä tuplap, tatar xorı oyıştırıp cibärde. Häm üz maqsatına ireşte dä. Dürt tawış belän cırlıy torğan xor barlıqqa kilde, tiz arada popularlaşıp ta kitte. Ul yıllarnı min räxmät xisläre belän iskä alam. İrnis abıy üze dä bezgä räxmätleder dip uylıym, çönki bezneñ repertuardağı berniçä cır soñğı qurs studentı İrnis Räximullinnıñ diplom eşe ide. Bez anıñ däwlät imtixanında qatnaştıq. Komissia bezneñ cırlarıbızğa <5>le bilgese quydı. Şunnan birle min dä üzemne äybät cırlawçılar rätenä kertep yörim...

İrnis abıy fidaqär keşe, üz eşenä, üz professiasenä baş- ayağı belän birelgän keşe. Qazan universitetında ul oyıştırğan tatar xalıq xorı menä 35 yıl inde yañğırawın däwam itä. Östäwenä anıñ äle tatar däwlät humanitar institutında, Qazannıñ tatar gimnazialärendä dä xor kollektivları bar. Ä töp eşlägän urını - M.Cälil isemendäge opera häm balet teatrı. Atqazanğan sänğät eşleklese.

Xormeysterlar xäzer küp, ämma çın professionallar barmaq belän genä sanarlıq. Milli muzıkabız alarğa bik tä moxtac. Şuña kürä alar kiräkle dä, qäderle dä. Tatar muzıka dönyasında üzeneñ yuğarı urının tapqan, xalqıbızğa armıy-talmıy xezmät itüçe yuğarı professional İrnis Äxmädulla ulı Räximullin näq şundıy qäderle şäxeslärebezneñ berse.

Tatarstan Däwlät Sowetı Räise urınbasarı G. Tuqay isemendäge Däwlät premiase lawreatı, xalıq şağıyre Robert Miñnullin

İrnis Räximullin - ğäcäyep törle yünäleşlärdä eşli alırday, bay icadi täcribägä iä talantlı muzıkant häm xor dirijerı.

Qazan Däwlät universitetınıñ, ul utız biş yıl buyı citäklägän Tatar Xalıq xorı kiñ tanılğan.

Musa Cälil isemendäge Tatar Däwlät Akademia opera häm balet teatrı xormeysterı bularaq ta ul yuğarı professionäl näticälärgä ireşte. Tatar opera teatrı xorı - Räsäydäge iñ, yaxşı opera xorlarınıñ berse.

Qazan Däwlät konservatoriäseneñ xor dirijerlığı faqültetında da İrnis Äxmädulla ulı unbiş yıl buyı maxsus klass alıp bardı.

Barlıq icadi qazanışların isäpkä alsaq, İrnis Ä xmädulla ulınıñ Tatarstandağı iñ kürenekle mäğrifätçe muzıkantlarnıñ berse ikänen kürerbez

Rusiä häm Tatarstannıñ atqazanğan sänğät eşleklese, Qazan däwlät konservatoriäse professorı Semen Kazaçkov