Роберт Миңнуллинның 70 яшьлек юбилеена багышланган "Шәрык һәм Гареб контекстында төрки халыкларның әдәбияты һәм сәнгате", халыкара фәнни-гамәли конференциясе булып үтте
КФУның Лев Толстой исемендәге Филология һәм мәдәниятара багланышлар институтында Татарстанның халык шагыйре Роберт Миңнуллинның 70 яшьлек юбилеена багышланган «Шәрык һәм Гареб контекстында төрки халыкларның әдәбияты һәм сәнгате», халыкара фәнни-гамәли конференциясе булып үтте.
Конференция кысаларында, 11 октябрь көнне, Татарстан Республикасының халык шагыйре, Г.Тукай исемендәге Дәүләт премиясе лауреаты, күренекле шагыйрь, балалар язучысы, дәүләт һәм җәмәгать эшлеклесе Роберт Миңнуллин белән очрашу һәм яңа китапларының презентациясе оештырылды. Cәләмләү сүзе белән, филология фәннәре докторы, Әзербәйҗанның халык шагыйре Сабир Рөстәмханлы (Баку, Азербайджан), филология фәннәре докторы, Баку дәүләт университеты профессоры Әскәр Рамис (Баку, Азербайджан), филология фәннәре кандидаты, Каракалпакстан дәүләт университеты доценты Джумамуратова Мәликә (Каракалпакстан, Нөкөс), филология фәннәре кандидаты, Л.Н.Гумилев исемендәге Евразия дәүләт университеты доценты Кеменгер Кайырбек (Казахстан, Астана), Казахстанның атказанган артисты Серик Оспан (Казахстан, Астана) һ.б. чыгыш ясады.
Конференция эшендә катнашу өчен илнең төрле төбәк галимнәреннән: Татарстан, Чувашия, Мари Эл, Башкортстан, Казахстан, Үзбәкстан, Каракалпакстан, Черногория, Төркия, Әзербәйҗан һ.б. йөзгә якын эш килде. Фәнни хезмәтләрдә татар әдәбияты тарихында Р.Миңнуллинның иҗаты, аның тоткан урыны бәяләнә, эшчәнлекнең әдәбиятлар арасында ныклы күпер вазифасын башкаруы ассызыклана.
