«Сүз белән кызганганчы, кечкенә генә булса да ярдәм күрсәтү күпкә яхшырак» девизы астында уздырылган акциядә һәртөрле кертем дә ирекле иде.
Волонтер һәм оештыручылар 58635 сум һәм 2 кытай юане туплаганнан соң, без, күмәкләшеп, Биектау районында урнашкан «Зоозабота» йортына юл тоттык. Ул инде бер ел буе Казандагы хуҗасыз хайваннарга ярдәм итә. Мин, журналист буларак, волонтерлар командасына кушылдым, чөнки мондый форсатны кулдан ычкындыру акылга сыймас иде. Безне «Зоозабота»ның рәисе, бик мөлаем хатын – Лариса ханым каршы алды. Аның сүзләренчә, аларга бу кадәр булышчының инде күптәннән килгәне юк икән. Әлеге приютны 3 сүз белән тасвирласак, ул: чисталык, ачык йөз һәм ярату булыр иде. «Зоозабота» хезмәткәрләренең генә түгел, ә бирегә ярдәм итү теләге белән килгән һәркемнең чиста нияте күренеп тора. Якты йөз: приютта һәр ишек тә ачык, теләгән вакытта песи һәм этләр янына кереп була. Иң мөһиме, үзеңнән соң вольерларны ябарга онытмаска. Һәм ярату! Кешеләргә һәм үз эшләренә карата мәхәббәт хисе. «Зоозабота» һәр төрле ярдәмне дә кабул итә. Мисал өчен, Универсиада авылы студентлары ассоциациясе, материаль ярдәм кертеп кенә калмады, питомникның түбәсен ябарга булышты, яңа вольерлар төзү өчен территорияләрне чистартты. Биредә, безнең белән бергә, шулай ук ярдәм итәргә теләүчеләр эшләде. Аларның кайберләре укудан соң, кайсыларыдыр эштән соң килгәннәр. Мисал өчен, анда Эвелина исемле кыз бар иде. Ул атна саен Казанның питомникларына барып булыша һәм бер эштән дә курыкмый икән. «Без инде берничә ел рәттән шундый масштаблы хәйрия акцияләрен уздырабыз», – дип ассызыклады Адина Кульмасова. «Зоозабота» хезмәткәрләре Лариса, Вера һәм аның ире Универсиада авылы командасын күп рәхмәт һәм җылы сүзләр белән озатып калды. Без исә, үз чиратыбыз да, әлеге рәхмәт сүзләрен сезгә җиткерәбез, дусларыбыз! Әлеге ситуациядә битараф калмаганыгыз өчен рәхмәт! Хәзер сезнең күңелегез, минеке кебек үк, тыныч һәм канәгатьтер дип уйлыйм.