08 сентября 2015
"Җылы кочагында каршы алды..."

2 сентябрьдән 6 сентябрьгә кадәр кояшлы Ростов- на- Дону шәһәрендә Бөтенроссия студентлар форумы булып узды. Анда Рәсәйнең төрле төбәкләреннән 2000 якын студент катнашты. Казан Федераль университетыннан да 40 якын кеше, бердәм делегация булып, бу форумга барды.

Рәсәйнең ин актив студентларын һәм профсоюз хәрәкәте лидерларын “Мәгариф өлкәсендәге социаль стандартлар”  мәйданчыгы берләштерде.  Бу мәртәбәле форумда  КФУның Филология һәм мәдәниятара багланышлар институты Габдулла Тукай исемендәге татар филологиясе һәм мәдәнияте бүлегенең профоргы 4 нче курс студенты Хәйруллина Алинә дә катнашты.

Форумның программасы очрашуларга һәм уку-укыту мастер-классларына бай булды. “Мәгариф өлкәсендәге социаль стандартлар” мәйданчыгы эшчәнлеге барышында РФ мәгариф һәм фән министры Д.В. Ливанов, М.Ломоносов исемендәге МДУ ректоры В.А. Садовничий, РФ мәгариф һәм фән министры урынбасары Е.А.Толстикова, РФ ­балалар һәм яшьләр тәрбиясе өлкәсендә дәүләт сәясәте департаментының директоры А.Э Страдзе форумчылар алдында чыгыш ясадылар.

Студентлар эш барышында тулай торакларда яшәү шартларын яхшырту һәм стипендиягә кагылышлы сорауларны төрлечә чишү юлларын эзләделәр, файдалы тәкъдимнәр ясадылар. Форумда алынган белемнәр һәм тәҗрибә киләчәктә яңа сулыш алыр дигән өметтә каласы килә...